LAOAG CITY – Kinumpirmaran ni Mr. Ricardo “Mango King” Tolentino, mangidadaulo iti Mango Growers Association Luzon a ciento porsiento a naapektaran dagiti produkto a mangga ditoy probinsya gapu ti kurikong.
Kuna na nga itay napan a tawen ket 35 a porsiento laeng dagiti naapektaran.
Inbatad ni Tolentino a dakkelen ti balur dagiti nadadael a bunga ti mangga ken dandani a maburas.
Gapu iti daytoy, idasar ni Tolentino ti napasar da a problema kadagiti kurikong ditoy probinsya iti maangay a Mango Congress.
Maysa ti makitkita da nga aramiden tapno matay dagiti insekto ket panangpoor iti aglawlaw iti poon ti mangga.
Innayon ni Tolentino a dakkel ti epekto ti climate change kadagiti mangga gapu ta naladaw iti panagtudo na ken panaglamiis ti panawen a tiempo ti panagtaod dagiti kurikong.
Naamuan na nga agserbi ti mangga para kadagiti kurikong a pagpaaduan da.
