LAOAG CITY – Naglikudan ni Atty. Emilio Doloroso Jr., a binutbuteng ken pinangtaan na ni Barangay Chairman Glenford Paguirigan ti Brgy. 30B Sta Maria ditoy siudad ti Laoag.
Inlawlawag na nga adda ti naipila a kaso kontra iti kapitan, da barangay kagawad Romeo Duldulao, Robert Aguinaldo kenni Mr. Joseph Agullana.
Daytoy ket kaso a robbery ken estafa gapu iti maipagarup nga iseserrek ni Agullana iti pasdek a panganan ti miki ken ti maipagarup a panangkalub dagiti tallo nga opisyal ti barangay ti maseknan.
Inpetteng ni Doloroso a nangabak iti kallabes iti naangay a preliminary conference gapu ta inadmitir ni Agullana ti pirma na.
Inbatad na a saan na a pulos a nakasarsarita ti kapitan ken ammo na a kukua na ti puesto.
Inpila na ti kaso a robbery gapu ti pannakaserrek ti puesto ken nadadael dagiti sumagmamano a sanikua.
