LAOAG CITY – Inpasigurado ni Baguio City Mayor Benjamin Magalong nga isubmitirna ken ni Presidente Ferdinand “Bongbong” Marcos Jr. dagiti dokumento mainaig iti palpak a flood control projects.
Inaramid ni Magalong ti rakurak kalpasan a ginutigot ti Malacañang nga ipasana iti Presidente dagiti dokumento ken dagiti ammona nga impormasion.
Inbatadna a manarimaan ti pannakaiyurnos dagiti ipasana a dokumento ken ni Presidente Marcos.
Mainaig iti daytoy, plano ti House of Representatives a mangiwayat ti imbestigasion iti maipagarup a maanomalya a flood control projects.
Kuna ni Magalong nga addaan daytoy ti impormasion manipud kadagiti kontratista a dagiti sumagmamano nga agpanpanday linteg ket maipagarup a nakaawat kadagiti kickback nga agbalor ti agingga iti 40% ti budget ti maysa a proyekto.
Inpettengna a 30% laengen ti budget ti nabatbati para iti aktual a flood control project a nagresulta iti substandard a kalidad.
Kalikagum ni Magalong a nasken nga idauloan ti third party ti imbestigasion kadagiti palpak a flood control projects.
Immuna iti daytoy, inbutaktak ni Marcos a 20% ti pakabuklan a P545 bilyon a budget dagiti flood control projects ket naipaay laeng kadagiti 15 a contractors.
