LAOAG CITY – Mapukpukaw ti maysa a balasang a taga Brgy. Juan iti ili ti Solsona.
Nabigbig ti balasang a ni Mary Queen Neri y Manaran, agtawen ti 21, cashier iti maysa a bookstore ditoy siudad ti Laoag.
Basar iti PNP – Solsona, napan nagtrabaho ti balasang idi Pebrero 13 ngem sipud idi ket saan a nagsubli iti pagtaengan da.
Gapu iti daytoy, madanagan dagiti kameng ti pamilya na isu a nagkamang da iti PNP.
Naamuan a nagturong payen dagiti kabagyan ni Neri iti pagtaengan ti nobyo na ngem negatibo ti resulta na.
Diniskribir dagiti kameng ti pamilya ti mapukpukaw a balasang a gagangay ti pammagina, agtayag iti lima a kadapan ken dua a pulgada, napudaw ken atiddog ti buok na.
Nakaarwat daytoy iti yellow polo shirt ken black slack pants nga uniporme da iti pagtrabahuan na.
