LAOAG CITY – Mapilaan ti qualified theft ti maysa a cashier gapu ti maipagarup a saan a naimaldit dagiti resibo iti rekord manipud idi Mayo 1, 2019 nagpatingga idi Enero 24, 2020.
Nabigbig ti suspek a ni Jenny Marie Ravelo, agtawen ti 29, balasang ken residente iti Brgy. 29 ditoy siudad ti Laoag.
Naamuan nga agpapaay ni Ravelo kas cashier iti maysa a pasdek negosyo iti Brgy. 17 ditoy siudad.
Segun kenni Police Senior Master Sergeant Eric Bumagat iti PNP Laoag, nagremit ti suspek kadagiti resibo ken kuarta iti head cashier a ni Reynalyn Nicolas, agtawen ti 33 ken residente iti Brgy. 45 Tangid ditoy siudad.
Naduktalan ni Nicolas nga awan dagiti dadduma a resibo ket kinumprontar na ti suspek..
Dagus nga inadmitir ni Ravelo ti inaramid na.
Rumrumwar nga agdagup ti nasurok 445 a ribo a pisos ti maipagarup a napukaw basar dagiti resibo a saan a nairekord.
Agtultuloy ti panangbirok dagiti otoridad kenni Ravelo.
