LAOAG CITY – Binuangay ni Mayor Michael Marcos Keon ti fact finding committee a mangtaming ti panagrarambol dagiti tallo a miembro ti Sangguniang Panlungsod ditoy siudad ti Laoag.
Segun kenni Keon, idauloan ni Atty. Josephus Neres, legal officer ditoy siudad ti mabukel a komite.
Malaksid kadagiti tallo a konsehal ket maayaban pay da Sangguniang Panlungsod Member Roque Benjamin Ablan kenni SP Member Jaybee Baquiran a nakakita ti nasao a pasamak.
Kuna ti mayor a mairekord dagiti sarita dagiti maseknan intono agsasarita da ken agserbi a pagibasaran dagiti kameng ti fact finding committee.
Maipalagip a nagrarambol dagiti tallo a konsehal a da SP Member Justine Chua, SP Member Edison Chua, ken SP Member Edison Bonoan idi Enero 29, 2020 iti agarup alas siete ti rabii kalpasan ti sesyon dagitoy.
