LAOAG CITY – Binalakadan dagiti otoridad dagiti senior citizen iti naiget a panagan-annad gapu iti panagraira manen ti panagagaw dagiti kriminal iti bag wenno sanikua dagiti nataengan idiay Honolulu
Segun kenni Bombo International Correspondent Manny Pascua, naripar dagiti otoridad ti pattern dagiti kriminal ken target da dagiti senior citizen.
Kuna na a ti kaudian a biktima ti panagagaw ti bag wenno wallet ket agassawa a taga Kansas.
Napasamak ti insidente idiay Alamoana Center iti Honolulu.
Inbatad ni Pascua a dinangran dagiti suspek dagiti agassawa a nataengan no sadinno nga immuna a dinangran da ti lakay nga agtawen ti 73 ken inagaw da ti bag ti baket nga agtawen ti 69.
Nupay kasta, tinulungan ti Visitor Aloha Society of Hawaii dagiti agassawa a biktima.
Innayon ni Pascua a naitaray met ti bag ti maysa pay a baket iti maysa a bus stop iti nasao a lugar.
