LAOAG CITY – Natubtob manen ti kalsada iti paset ti P. Gomez Street ditoy siudad ti Laoag iti baet nga awan pay ti makatawenna a nalpas daytoy a proyekto.
Basar kadagiti sumagmamano a motorista ken residente iti nasao a lugar, masdaawda no apay adda manen ti balbaliw a pannakatubtobna uray awan met ti makitada a perdi iti nasao a kalsada.
Segun kadakuada, adda dagiti gundaway nga one lane laeng ti malukatan wenno naipawil ti panagdalyasat dagiti lugan tapno maipaayan ti gundaway a naan-anay a matarimaan a nangitunda ti nairot a trapiko iti nasao a lugar iti kallabes.
Inbatad dagiti residente a posible a natubtob ti kalsada gapu iti inkabilda a dakkel a pipe iti uneg daytoy nga inyarigda ti manarimaan a maar-aramid iti sango ti Kapitolio Probinsial.
Mainaig iti daytoy, inlawlawag ni Engr. Marichell Batuac, mangidadaulo ti City Engineering Office ditoy siudad ti Laoag a saan a proyekto daytoy ti lokal a gobierno gapu ta ti nasao a kalsada ket maibilang kas national road isu a daytoy ket iggem ti Department of Public Works and Highways.
Kabayatanna, inpakaammo ti Department of Public Works and Highways – First District Engineering Office nga iti agdama a mapaspasamak ket remove and replace.
Inpettengna a saan a ti pipe ti problema no diket iti semento nga inusarda iti nasao a kalsada.
Inlawlawagna nga adda ti nakitada a panagbettakna daytoy rason no apay a pasukatanda ti contractor ti proyekto.
Innayonna a daytoy a proyekto ket narugian idi 2023 ken nalpas idi 2024 ken nailatangan ti pundo nga 45 a milyon a pisos nga agatiddog ti 220 a metro.
