LAOAG CITY – Kinumpirmaran ni Bombo International Correspondent Manny Pascua a masenggeg iti masungad a lawas ti kaso ti agnagan ti Felina Salinas, maysa kadagiti opisyal ti Kingdom of Jesus Church idiay Hawaii.
Segun ken ni Pascua, iti Federal Court iti Honolulu ti pakadengngegan ti kaso.
Inbatad ni Pascua, a namunganay ti pannakaarestar ni Salinas gapu iti gandat na a mangipuslit iti agarup 335 a ribo a dolyar manipud idiay Honolulu ken maipan ditoy Pilipinas idi tawen 2018.
Nadiskubre ti nasao a gatad iti maysa a pribado nga eroplano.
Naamuan ni Pascua a nakaukkon ni Pastor Apollo Quiboloy ti 20 a milyon a dolyar iti uneg ti lima a tawen.
Rumrumwar a maipagarup a mausar ti nasao a kuarta para kadagiti ubbing ditoy Pilipinas ngem timpuar ti damag a maar-aramat daytoy iti bukod nga interes ti pastor.
Innayon ni Pascua a naukkon ti nasao a gatad babaen kadagiti maiwayat a fund raising ken panagsolicit dagiti miembro ti relihiyon kadagiti tattao idiay Hawaii.
