LAOAG CITY – Nakaru ti kasasaad ti maysa a lakay kalpasan a naregreg manipud iti bubong ti pagadalan iti Cacafean Elementary School, Brgy. Cacafean iti ili ti Marcos.
Iti nakalap nga impormasyon ti Bombo Radyo Laoag, agnagan ti Carlos Barid ti nasao a lakay ken timmulong a nakipagpinta iti galba ti pagadalan gapu ta adda ti apoko na nga agad-adal iti nasao nga eskuela.
Naamuan ti Bombo Radyo Laoag nga idi intaray dagiti maseknan ni Barid usar iti kurong-kurong iti Marcos Hospital ket dita a nakadinnungpar da ti maysa a motorsiklo nga inturong ti agnagan Marcelino Barid a maysa a barangay Tanod.
Nagsagaba met ti barangay tanod ti sumagmamano a sugat kalpasan ti desgrasya.
Basar iti impormasyon, agkabagyan dagiti dua a Barid.
Iti mainaig a damag, inlawlawag ni Mrs. Maybel Estacio, mangisursuro iti Cacafean Elementary School iti ili ti Marcos a naituding iti pannakapinta ti pagadalan gapu ta nakaiprograma daytoy iti MOOE ken awan ti nailatang a gunguna dagiti agtrabaho.
Kuna na nga idi Domingo ket nagpaubra ti kadua na iti pagadalan gapu ta saan a nalpas dagiti nagannak iti Grade 6 a pintaan ti bubong ti pagadalan itay napan a lawas.
Segun kenni Estacio, mapintaan kuma it blackboard ti kinder ngem gapu ti suhestiyon a saan da a dagus a maisubli ti blackboard.
Inbatad na a nailungalong nga agpinta da laengen iti galba ken nakipagpinta ni Tata Carlos Barid kalpasan a dimmanon iti manarimaan a panagpinta dagiti maseknan.
Kuna na a saan da a nakita nga immuli ni Barid iti galba a napan nagpinta iti galba.
Innayon ni Estacio nga idi nakababa dagiti maseknan ket nagbati ni Barid iti bubong ken saan na a kinayat ti bimmaba idi gutgutigoten da a bumaba.
Inpetteng na a saan a naigagara iti pannakaregreg ti lakay ken posible a naigalis bayat nga adda iti bubong ti pagadalan.
Innayon ni Estacio a saan nga inrequire ti PTA a makipagpinta ti senior citizen.
