LAOAG CITY – Nasugsugatan ti maysa a lakay kalpasan a dinanog-danog ti suspek iti Brgy. Francisco iti ili ti Dingras.
Nabigbig ti biktima a ni Narding Sebastian y Bernardo,agtawen ti 64 idinto a ti suspek ket ni Jerwin Sebastian y Asuncion, agtawen ti 31, baro, drug surenderer agpada a residente iti nasao a barangay.
Segun kenni Police Major Ryan Retotar, hepe ti PNP Dingras, bayat nga agpadpadanum ti biktima iti pagtatalonan ket maipagarup a dimteng ti suspek ken dinanog na ti lakay.
Kuna ni Retotar a dinanog ti suspek ti lakay gapu ta maibusanen ti danum iti irigasyon a sakopen ti pagtatalonan na.
Inbatad ni Retotar nga agimbestigar da pay no adda iti dati a susik dagiti dua iti kallabes.
Kalpasan ti panangdanog ti suspek iti lakay ket nadislocate ti panga na ken naitaray iti Dingras District Hospital ken naiyakar iti Gov. Roque Ablan Sr. Memorial Hospital ditoy siudad ti Laoag.
Buluntaryo a simmuko ti suspek ken maisagsagana dagiti maipila a maiyannatop a reklamo kotra kenkuana.
