LAOAG CITY – Agtultuloy a mabirbirok ti maysa a baro kalpasan a nagtakaw ti cellphone iti maysa a pagtaengan iti Brgy. 24 ditoy siudad ti Laoag.
Nabigbig ti suspek a ni Rommel Esta Manuel, agtawen ti 24, residente iti Brgy. 14 ditoy siudad.
Basar iti inisyal nga imbestigasyon ti PNP Laoag, nagturong ti suspek iti pagtaengan ti biktima a ni Cathrine Tabangco Andres, maysa a balasang ken residente iti Brgy 24 ditoy siudad
Kabayatanna, pimmanaw ni Andres ken inbati na ti cellphone a nakacharge iti uneg ti pagtaengan da ken nagtalinaed ti ina na iti pagtaengan.
Idi manarimaan ti panagsarsarita ti suspek ken ti ina ti biktima ket dita nga innala ti suspek ti nakacharge a cellphone.
Saan met a sinita ti ina ti biktima gapu ta ti ammo na ket kukua na daytoy.
Naamuan pay ti Bombo Radyo a saan laeng a damo nga aramiden ni Manuel ti agtakaw kadagiti napateg a banag gapu ta addan dagiti naipila a kaso kontra kenkuana iti piskalya mainaig ti nasao nga aramid.
Rumrumwar a ti maipagarup a mudos ti suspek iti kallabes ket makiam-ammo kadagiti bisita dagiti pada na a balod bayat nga adda iti pagbaludan.
Kalpasan a mawaya-wayaan ket dita a mapan bumisita kadagiti pagtaengan dagiti pamilya a kinasarsarita na iti pagbaludan ken gundawayan na a takawen dagiti napateg a banag kas iti cellphone ken dadduma pay.
