LAOAG CITY – Natay ti driver ti kurong-kurong ken maysa ti nasugatan kalpasan a nadungpar ti maysa a van iti paset ti Airport Avenue ditoy siudad ti Laoag.
Nabigbig ti biktima a ni Rogelio Gaspar, idinto a nasugatan ti asawa na a ni Benie Gaspar ken agpada a residente iti Brgy. 48A Cabungaan ditoy siudad.
Basar iti imbestigasyon ti PNP Traffic Division, agpapalaud a direksiyon ti kurong-kurong nga inturong ti biktima kasta met ti van nga inturong ni Juda delos Reyes, agtawen ti 54, naasawan, ken residente iti #2718 old pandero street Sta. Ana Manila ken nakalugan dagiti crew ti teleserye a Darna.
Nagpakannigid a direksiyon ti kurong-kurong bayat a nakaflasher rason a nadungpar ti nasao a van.
Kas resulta, umabot ti 29 a metro ti kaadayo ti pannakaipurwak da.
Naitaray a dagus dagiti agassawa iti ospital ngem naideklara a dead on arrival ni Rogelio idinto a nagsagaba ni Benie ti nakana a sugat ngem naiyakar iti Mariano Marcos Memorial Hospital and Medical Center iti siudad ti Batac.
Nagtalinaed ni delos Santos iti kustudyar ti PNP Laoag kalpasan ti nakaam-ames a desgrasya.
Iti mainaig a damag, inpetteng ni Juda delos Reyes, a kelaat a nagpakannigid dagiti biktima rason a nadungpar na dagitoy.
Inbatad ni delos Reyes a saan a nagusar iti signal light ti kurong-kurong ken saan na a ninamnama a nagpakannigid dagiti biktima.
Gapu iti daytoy, nagkiddaw ti pammakawan iti pamilya dagiti nadungpar na ken iti daytoy nga aldaw nga agawid da koman.
