LAOAG CITY – Inlawlawag ni Mrs. Janet Duarte, DILG officer ditoy siudad ti Laoag a maingato ti kaso no saan a nasulbar iti uneg ti barangay ti maysa a parikut.
Daytoy ket mainaig ti maipagarup a pannakabakal ti agnagan ti Catherine Magay babaen kenni Barangay Kagawad Gilbert Miguel usar iti bote ti sili ken paminta iti maysa a panganan iti Brgy. 2 ditoy siudad ti Laoag.
Ni Maggay ket agppapaay pasdek panganan a kukua ti maysa a pamilya iti nasao a barangay.
Segun kenni Duarte, inbalakad na kenni Magay a kitaen da ti panagtignay ti barangay chairman ti nairekord a mapasamak.
Inbatad ni Duarte a kasapulan a paneknekan ni Magay a kaso administratibo ti inaramid ti kagawad nangruna no adda iti pannakainaig iti trabaho na.
No bilang saan a masulbar ti kaso ket maipangato babaen iti certification to file action kontra ti mairekreklamo.
Mainaig iti daytoy, no bilang agtennag a “luppon case” ti pasamak ket addaan iti 15 nga aldaw a panangtratar ti kapitan dagiti bumarangay.
Iti mainaig a damag, inbunannag ni Catherine Magay, ti nabakal ti bote ti sili ken paminta babaen kenni Barangay Kagawad Gilbert Miguel nga awan ti naiyuswat pay a panagsasarita da.
Kuna na nga idi kuma kalman iti panagsasarita da ngem saan a natuloy gapu ta maipagarup nga awan ti kapitan ti barangay.
Segun kenni Magay, awan ti pormal a pakaammo gapu ta text message laeng ti naawat na manipud iti anak ti amo na.
Mainaig iti daytoy, nagipila ni Magay ti reklamo babaen ti panangasikaso ti secretary ti barangay.
Porsigido nga ireklamo na ti kagawad tapno saan a mapanunuyan ti madi nga aramid na.
Kinumpirmaran ni Barangay Secretary Marties Batuon iti Brgy. 2 ditoy siudad ti Laoag nga awan pay ti naiwayat a panagsasarita ti partido ni Catherine Magay kenni Brgy. Kagawad Gilbert Miguel.
Daytoy ket gapu ta masakit ni Barangay Chairman Dan Carlo Toledanes iti nasao a barangay.
Segun kenni Batuon, manamnama a mapatulodan ti surat dagiti maseknan mainaig ti panagsasarita da.
Inbatad na a suruten da ti proseso ti linteg ti DILG maipapan iti panangsulbar da ti reklamo ni Magay.
Maipalagip a nagriri da Magay kenni Miguel itay kallabes gapo ti maipagarop a pinangbakal ti kagawad kenni Magay iti nakabotelya a sili ken paminta iti pasdek panganan a pagserserbian ni Magay iti nasao a barangay.
Inyuman ni Magay iti DILG ditoy siudad ti Laoag ti napasamak kadakuada kenni Miguel kalpasan iti panagreklamo na iti barangay.
