LAOAG CITY – Natay ti maysa a lalaki ken maysa ti nasugatan kalpasan a nadesgrasya ti nagluganan da a motorisklo iti Brgy. Poblacion iti ili ti Burgos.
Binigbig ni Police Master Darwin Macalma, chief investigator iti PNP Burgos dagiti biktima a da Dominic Lorega, agtawen ti 23, driver ti motorsiklo kenni Alvin Bunuan, agtawen ti 35, lubbon iti motorsiklo ken agpada a residente iti Brgy. Macanaya, Aparri, Cagayan.
Segun kenni Macalma, bayat ti panagpaabagatan dagiti maseknan iti Brgy. Poblacion ken idi nakadanun da iti sharp curve ti kalsada ket naidungpar da iti pader, iti poste ti street light ken naregreg da iti kanal.
Inbatad ni Macalma a maipagarup a napaspas ti motorsiklo nga ni Lorega rason a naawanan ti kontrol idi madanun na ti kurbaan iti kalsada.
Dagus a naitaray dagiti biktima iti ospital ngem pimmusay ni Bunuan.
Nagturong met ti pamilya dagiti biktima nga agkayong iti ili ti Burgos kalpasan a naipakaammo kadakuada ti insidente.
