LAOAG CITY – Inlawlawag ni Allan Janio, agpapaay iti pizza parlor iti ili ti Bangui ti pannakaloko da babaen ti maysa a prank caller a nangusar iti nagan ni Mayor Fidel Cimatu.
Kuna na a nagorder ti nagpammarang a mayor iti pizza, pasta ken manok para iti 20 a tattao ken agbalur iti agarup 5,000 a pisos.
Segun kenni Janio, umay mangan dagiti 20 a tattao iti puesto da ngem saan da nga immay.
Inpetteng na a saan na nga ammo ti boses ti mayor iti telepono idi timmawag ti prank caller.
Inbatad ni Janio a nagpaorder ti nagpammarang a mayor iti wine kenkuana.
Inbunannag na a nainaganan ti “Budoy” nga umay agbayad kadakuada.
Naamuan ti Bombo Radyo a ti agnagan ti Budoy ket kadua ti mayor iti pagtaengan da ngem awanen isuna iti pagtaengan da.
Saan pay laeng a nagatap ni Janio nupay naglabesen ti 12:30 ti aldaw nga iyuumay da gapu ta ti ammo na da adda da pay laeng iti dalan.
Mainaig iti daytoy, inpakaammo ni Janio a nagpaload pay ti caller kenkuana iti maysa a parmasya a kaabay ti paggatangan ti wine.
Kuna na nga inbasa na ti numero a mapaloadan iti balur a sangaribo a pisos.
Kalpasan iti daytoy, inbatad ni Janio nga inbilin ti caller kenkuana nga ipasa na ti telepono iti agpalpaload iti parmasya.
Segun kenni Janio, immabot iti agarup maysa nga oras a nagpalpaload ti caller iti trabahante ti parmasya.
Naklaat lattan ni Janio nga immabot iti 24 a numero a napaloadan ken immabot iti nasurok 30,500 a pisos a balur dagiti load.
Inpetteng na a ti pammati na latta iti caller ket ni mayor daytoy.
Innayon ni Janio a nagbalaw da laengen idi awan iti immay mangan kadagiti naorder a taraon ken inpakaammo da ti insidente iti boss da.
Iti mainaig a damag, inpetteng ni Pol. Master Sergeant Edimar Yadao, ti Chief investigatior iti ili ti bangui nga agtultuloy ti imbestigasyon da mainaig iti inaramid a bogus buying dagiti prank caller.
Kuna na nga apaman nga adda ti nagreport iti opisina da nga agtagikua iti establisyimento a nausar iti panagbudol dagiti prank caller, dagus a tinawagan da dagiti numero nga inusar ti prank caller ngem saanen a makontak pay dagitoy.
Gapo iti daytoy, kalikagum ni Yadao a makipagkoordinar iti telecommunications tapno maduktalan ti siasinno man a nangaramid ti nasao a bogus buying.
Naamoan a daytoy ti umuna a kaso ti prank calling iti nasao nga ili ken agdama a maad-adal nu adda ti amammo ti prank caller iti nadakamat nga ili a mabalin a kasabwat na.
