LAOAG CITY – Umabot iti 6,075 ti manamnama nga agturpos a kindergarten, elementarya ken secondarya ditoy ciudad ti Laoag ita nga School Year 2025-2026
Daytoy ti inpakaammo ni Ms. Imee Nicolas, ti Project Development Officer 1 Youth Formation ti Department of Education ditoy ciudad ti Laoag.
Mainaig iti daytoy, inpalagip ni Nicolas iti linaon ti memorandum no. 50 series of 2025 a mangimanmandar kadagiti amin a pagadalan ditoy pagilian a pagbalinen laeng a simple ken saan a nangina ti maiwayat a graduation rites.
Inbatad na nga uray simple ngem maipangpangruna ti pudno a kaipapanan ti nasao a seremonya a daytoy ket ti panangbigbig ti panagballigi dagiti agturpos nga estudyante.
Inpakaammo na a ti inaramid ti Schools Division ti Laoag City tapno maipasigurado a sumurot dagiti pagdalan ditoy ciudad ket nangiyetnag da ti division memorandum kadagiti pagadalan ken kasta pay a nangisayangkat da ti management committee meeting nga inatendaran dagiti school heads ken amin a personnel tapno maipalagip ti nakaipalaon ti memorandum ti Department of Education.
Innayon na nga ipalubos da pay ti panagsuot laegen ti school uniform imbes a toga ken saan a rumbeng a kaadwen ti agimbitar ti bisita.
Kabayatanna, inpaganetget ni Nicolas a maipawil ti panagkolektar ti aniaman a gatad kadagiti estudyante ken nagannak para iti graduation, kas naipalaon iti “no collection policy” a naiget nga ibilbilin ti Department of Education.
Nupay kasta, kunana ano adda dagiti kalikagom nga aramiden dagiti nagannak a mainayon ket ti Parents Teachers Association ti mangidaulo ken saan a makibiyang dagiti personnel ti pagadalan.
