LAOAG CITY – Umabot ti nasurok 10 a tawen ti binusbus ti Mariano Marcos State University a nagsukisok iti technolohiya tapno matulungan ti gobyerno a makaparnuay ti bio ethanol wenno bio energy.
Daytoy ti inbatad ni Dr. Shirley Agrupis, presidente iti nasao nga unibersidad iti siudad ti Batac
Iti agdama, naipatakderen ti Bio-energy Center babaen ti tulong da Sen. Win Gatchalian kenni Sen. Loren Legarda babaen ti panangilungalong ni Cong. Lord Allan Velasco , chairman ti bio-energy committee ti kongresso.
Segun kenni Agrupis, agserbi ti pasilidad kas techno-hub iti research and development agraman ti extension program kadagiti nadevelop da a teknolohiya.
Kuna na nga inadaptar dagiti nagduduma nga state university a kabinnulig ti MMSU seknan iti kalikagum a makaparnuay ti renewable energy.
Mainaig iti daytoy, inbunannag ni Dr. Agrupis a panagusar ti nipa sugar kas maaramid a renewable energy kalpasan nga inadal da daytoy.
Iti mainaig a damag, inpakaammo ni Dr. Shirley Agrupis, presidente iti MMSU iti siudad ti Batac a manarimaan iti panangiyuswat dagiti mannalon ti distillation usar dagiti nakolektar da a nipa sugar wenno nipa SAP a naidalan iti fermentation.
Inbatad na nga agtultuloy ti prosesso iti ili ti Pamplona Cagayan ken addan dagiti naaramidda nga uppat a ribo a litro ti 95% enthanol.
Malaksid iti nasao a lugar, kinumpirmaran ni Agrupis nga agsagsagana da metten a mangiyuswat ti Village Skill Bio Ethanol para kadagiti residente iti Aparri gapu ta adu ti mula a nipa iti nasao a probinsya.
Inpakaammo na nga adda pay ti national program da a punpundoan ti Department of Environment and Natural Resources gapu ti rekomendasyon ni Sen Win Gatchalian.
Innayon ni Dr. Agrupis a nasken nga agpaado da kangrunaan iti panagmula ti Nipa ken mangiyestablisar iti Nipa Plantation.
Inlawlawag ni MMSU President Dr. Shirley Agrupis a makaipaay ti adu a likido ti Nipa kalpasan ti sumagmamano nga oras wenno aldaw.
Kuna na a saanen a baro kadakuada ti kaadda ti asukar ti Nipa Sap gapu ta daytoy ti kangrunaan a maar-aramid iti panagaramid ti lambanog.
Innayon ni Agrupis nga agtultuloy ti panagsukisok dagiti maseknan rason nga agturong da pay iti sabali a probinsya nga addaan ti Nipa plantation tapno maduktalan iti kinatubbog dagiti mula a nipa.
