LAOAG CITY – Nauram ti maysa a paset ti Filipinas West Elementary School iti ili ti San Nicolas.
Nupay kasta, dagus a nalapdan dagiti otoridad iti panagramram ti apoy kalpasan iti insegida a panagreport dagiti nakaripar ti nasao nga uram.
Segun kenni Fire Sr. Insp. Ronald Castillo, municipal fire marshal iti nasao nga ili, adda dagiti nakita da a palito ti posporo a maipagarup a nagpuuran dagiti saan a nabigbig a tattao.
Saan a masigurado ni Castillo no pagipondoan kadagiti softdrinks ken dagiti makmakan wenno mismo a kantina iti nasao a pagadalan.
Mamati ni Castillo nga inranta dagiti saan a nabigbig a tattao ti nangpoor ti nasao a pasilidad.
Inbatad na a perdi met dagiti CCTV a pangkitaan da kadagiti posible nga akin aramid ti gandat a pannakauram ti pagadalan.
Nagyaman ni Castillo iti alisto a panagresponde ken panagreport ti nakakita nga agap-apoy ti paset ti pagadalan.
Innayon na a nauram dagiti sumagmamano a plastic ti ngato ti durabox, ken dagiti christmas decoration.
Iti mainaig a damag, nagyaman ni Mrs. Vilma Bagay, principal iti Filipinas West Elementary School iti ili ti San Nicolas iti nangidanun iti BFP ti pannakauram iti paset ti kantina iti nasao a pagadalan.
Kuna na a dagus a nasebseban dagiti kameng ti BFP ti apoy rason a saanen a nagramram.
Segun kenni Bagay, mangiwayat da iti panagtataripnong babaen dagiti nagannak ken dagiti mangisursuro.
Inbatad na a no bilang nairanta ti insidente ket nasken nga agsungbat ti nangaramid.
Innayon ni Bagay ng agserbi nga adal ti insidente kadakuada iti agnanayon a panagan-annad tapno maliklikan ti uram.
