LAOAG CITY – Kaadda iti impluwensya ti nasanger ken puyat dagiti rason a naaksidente ti maysa nga inhinyero iti paset ti Brgy. 20 San Pablo iti ili ti San Nicolas.
Daytoy ket kabayatan nga agpapaamianan a direksyon a naggapu iti maysa a seminar idiay probinsya ti Pangasinan.
Segun kenni Police Cpl. Romeo Bartolome iti PNP Traffic Division iti nasao nga ili, saan a naripar ni Mark Angelo Calad y Mateo, agtawen ti 33, ken residente iti Brgy. 1 ditoy siudad ti Laoag ti nakabunton a darat iti igid ti national highway.
Gapu iti daytoy, nagsikig ti kotse nga inturong ni Calad ken nagsagaba ti sugat iti makinkannigid a takyag na.
Naitaray ni Calad iti Mariano Marcos Memorial Hospital and Medical Center iti siudad ti Batac para iti naan-anay nga eksaminasyon na.
