LAOAG CITY – In-inoten a maib-ibus ti suplay dagiti kangrunaan a magatang iti nagduduma a merkado idiay Italy.
Iti report ni Bombo International Correspondent Demetrio Bong Rafanan idiay Roma, dagiti kangrunaan a kasapulan ita a panagraira ti coronavirus ket face mask, disinfectants ken dadduma pay.
Nupay kasta, in-inoten iti pannakaibus na gapu iti panagpanic buying dagiti Pilipino ken residente iti nasao a lugar.
Kuna ni Rafanan a ngimmato pay ti presyo dagiti nasao a produkto gapu ti kinababa ti suplay.
Inbatad na nga awan pay ti naamuan na a Pilipino a naapektaran ti COVID-19 idiay Roma.
Basar iti kaudian a datos, ti Italya ti maikatlo a kaaduan iti kaso ti COVID-19 nga umabot ti agarup 900 dagiti naakaran, 21 dagiti pimmusay ken 46 dagiti naagasan.
