LAOAG CITY – Naapektaran dagiti sumagmamano a travel agency ditoy probinsya gapu ti coronavirus disease.
Segun kenni Mrs. Rose Agno, agtagikua ti maysa a travel agency, bimmaba ti bilang dagiti agbiyahe a mapan iti pagilian a China, Japan, South Korea, ken Hongkong gapu ti virus.
Kuna na nga adu dagiti nangitantan iti panagbiyahe da iti nagduduma a pagilian ken immabot ti 95 a porsiento ti nagbabaan ti bilang dagiti kliyente na.
Inbatad ni Agno a ti nabati a lima a porsiento ket dagiti agbiyahe nga agturong ditoy probinsya idinto nga awan dagiti kliyente na nga agbiyahe iti sabali a pagilian wenno umay agpasyar ditoy Pilipinas.
Inbunannag na adda dagiti sumagmamano a kliyente da nangruna dagiti overseas Filipino workers ti mangipilit ti agbiyahe rason nga agpapirma met iti katulagan.
Innayon ni Agno a nakasentro ti imatang da pay dagiti mapan agnaed iti pagilian nga Estados Unidos, Canada ken New Zealand.
