LAOAG CITY – Addan iti natalged a kasasaad ti ubing nga agtawen ti lima kalpasan a nadungpar ti kotse iti Brgy. Pagdilao iti ili ti Pinili.
Daytoy ti kinumpirmaran ni Police Staff Sgt. Wilson Herera, imbestigador iti PNP Pinili.
Immuna iti daytoy, nagpadaya a direksiyon ti kotse nga inturong ni Antonio Dahilig y Aganon, agtawen ti 46, naasawaan, dati nga OFW ken residente iti Brgy. Badjo iti ili ti Pinili idi ta kelaat a bimmalasiw ti ubing.
Gapu iti daytoy ket nadungpar ti biktima ken naipurwak.
Dagus nga intaray ni Dahilig ti ubing iti maysa a clinic iti nasao nga ili ken dagus a naiyakar iti Mariano Marcos Memorial Hospital and Medical Center iti siudad ti Batac.
Kuna na a maipagarup a nadaraan ti ulo ti ubing ngem addan iti nasayaat a kasasaad.
Basar iti apo ti ubing a ni Arlene Baldugo residente iti Brgy. Badjo, saan na a nasiputan ti apoko na napan iti kalsada gapu iti panagbuya da ti Pinili Got Talent.
Naamuan a nataray ti kotse idi nadungpar na ti ubing nga agtawen ti lima.
