LAOAG CITY – Maisagsaganan ti maipila a kaso a reckless imprudence resulting to homicide ken physical injury kontra ti driver ti van a nakadungpar iti kurong-kurong ditoy Brgy. 48A Cabungaan, Laoag City.
Nabigbig ti driver ti van a ni Juda delos Reyes a residente iti Sta. Ana, Manila ken nagtalinaed iti kustudyar ti PNP Laoag.
Immuna iti daytoy, nadungpar na ti kurong-kurong nga inturong ni Rogelio Gaspar kadua na ti asawa na a ni Benie Gaspar agpada a residente iti nasao a barangay idi nagpakannigid a direksiyon.
Naipurwak dagiti agassawa iti agarup 29 a metro ken naitaray da iti Laoag City General Hospital.
Naideklara a pimmusay ti lalaki idinto a maag-agasan pay laeng ti asawa na iti Mariano Marcos Memorial Hospital and Medical Center iti siudad ti Batac kalpasan a naiyakar.
Naamuan a kadua ni delos Reyes dagiti crew ti teleserye a Darna idi napasamak ti aksidente.
