LAOAG CITY – Inpakaammo ti Department of Social Welfare and Development nga adda ti 1.4 a bilyon a pisos ti nailatang kas El Niño fund no sadino ket addan ti 60 a probinsia iti manamnama a mabenepisiaran.
Mainaig iti daytoy, kuna ni Provincial Social Welfare and Development Office Head Rochelle Gajes nga addan dagiti impormasion a naipadanon kadakuada maipanggep iti pundo ti El Niño nga inpaay ti gobierno.
Segun kenkuana, ti nasao a pundo ket maipaay kadagiti mannalon a naapektaran iti El Niño phenomenon.
Inbatadna a daytoy ket maysa a cash for work program ken adda ti maidiaya babaen ti training kadagiti mannalon tapno maliklikan ti pannakaapektar iti El Niño phenomenon.
Kinunana a nakikoordinar ti ahensia kadagiti lokal a gobierno babaen ti panagpilida kadagiti nagbalin a benepisiario iti nasao a programa.
Malaksid iti daytoy, awan pay ti kumpirmasion a naawawatda ken ti pundo a maidiaya kadakuada.
Kabayatanna, namnamaen ti mangidadaulo iti Provincial Social Welfare and Development Office Gajes a maysa ti probinsia a maipaayan ti nasao a pundo tapno adda ti maidiaya a tulong kadagiti residente nga agkasapulan gapu iti mapaspasaran nga El Niño phenomenon.
