LAOAG CITY – Napawilan nga agusar ti dakkel a bag dagiti Pilipino a napili a makitaripnong ken ni Presidente Rodrigo Duterte idiay Russia intono bigat, Oktubre 5, iti oras ti alas-onse ti rabii, oras ditoy Pilipinas.
Daytoy ket basar ken ni Miss Ystiel Mina, taga Ilocos Sur ngem agdama nga agtrabtrabaho idiay Russia ken maysa kadagiti napili a makitaripnong ken ni Presidente Duterte.
Inbatad ni Mina nga umabot ti 1,500 a Pilipino ti napili a makitaripnong ken ni Duterte ken maragsakan gapu ta maysa daytoy a napagasatan a napili.
Kuna na nga agarop 5 ribo a Pilipino dagiti nagsurat iti embahada ngem 1,500 laeng ti naaprubaran gapu ta bassit ti venue.
Iti interview ti Bombo Radyo Laoag ken ni Mina, inbatad na bassit laeng a bag ti masapol nga usaren da, masapol a nakasilent mode ti cellphone ken liklikan da ti agitugot kadagiti banag a mabalin a mangitunda ti ringgor.
Innayon na a masapol nga itugot da ti original passport ken ti registration number tapno makastrek da iti venue.
Kabayatanna, kinumpirmaran ni Mina a nasakit ti nakem dagiti Pilipino a saan a napili a makitaripnong ken ni Presidente Duterte.
Kuna na nga adda dagiti mangibagbaga nga unfair umano ti panagpili ti embahada.
