LAOAG CITY – Umabot iti sumurok-kumurang 1.9 milyon a deboto ti nagatendar iti solemn ken tradisional a prosision ti Santo Niño de Cebu idi Sabado sakbay ti mismo a fiesta ti Sto. Niño basar iti Cebu City Disaster Risk Reduction and Management Office.
Kinumpirmaran ni Councilor Dave Tumulak, karaman kadagiti tattao iti 5.5 a kilometro a ruta ti prosision pakairamanan dagiti bangketa ken uneg ti basilica.
Iti napalabas a tawen, umabot laeng ti 1.4 milyon ti nagatendar para iti nasao a fiesta.
Pasado ala-1:00 ti malem idi nangrugi ti prosision ken nakasubli iti Basilica Minore del Santo Niño ti carroza sakbay nga ag-ala-5:00 ti malem.
Naruay a deboto ti nakigiddan iti ruta iti baet ti kinapudotna ngem in-inot a nagbalin a naulep ti paniempo iti maudi a paset ti prosision.
Basar met iti Cebu City Police Office, nagbalin naurnos ken nakappia ti prosision.
Nagtalinaed a naiget ti security alert iti lugar nangruna iti mapaspasangasangan a Sinulog Festival ken grand parade ita nga aldaw ti Domingo.
