LAOAG CITY – Natay ti maysa a baro a nakalugan iti motorsiklo kalpasan a nadisgrasya idiay Brgy. Guerrero iti ili a Dingras.
Nabigbig daytoy a ni Ariel Martinez y Delos Santos, 18, estudyante ken residente ti Brgy. Foz iti nasao nga ili idinto a ti nangiturong ti motorsiklo a naglugananda ket ni Alvin Carbonell y Rosqueta, 19, estudyante ken residente iti nasao a barangay.
Basar iti imbestigasyon, bayat nga agpadpadaya a diresyon iti paset ti Josefa Llanes Escoda Road dagiti biktima ket saanda a naripar ti maysa kadagiti barikada rason ti pannakaidungparda iti igid ti rangtay.
Nagsagaba ti sugat iti akin-kannigid a paset ti ulo ken gasgas iti sumagmamano a paset ti bagi ni Carbonell idinto a na-fructure ti ulo ni Martinez rason nga insigida a naitaray dagitoy iti Gov. Roque Ablan Sr. Memorial Hospital.
Nupay kasta, pimmusay ni Martinez bayat a matamtaming iti nasao nga ospital.
Naamoan a saan a nakasuot ti helmet dagiti biktima ken awanan ti lisensya nga agmaneho ni Carbonell.
