LAOAG CITY – Balligi a naiyawid iti ili ti Currimao ti maysa a milyon pisos kalpasan nga isuda ti Champion iti Tan-ok ni Ilocano Festival of Festivals 2023.
Dagiti partisipantes ket ditoyda nga inpabuya ti ipagpanpannakkelda a Dinaklisan Festival.
Ti Dinaklisan ket manipod iti sarita a “Daklis” a ti kayatna a saoen ket maysa a local fishing instrument.
Daytoy ket maysa a dakkel a rectangular fishing net no sadino daytoy ti kangrunaan nga us-usaren dagiti maseknan a residente nga isu ti pangalaanda ti pamastrekanda.
Maisaysayangkat ti pannakaselebrar ti Dinaklisan Festival iti ili ti Currimao iti maudi a lawas ti bulan ti Abril agingga iti umuna a lawas ti Mayo.
Kagiddan iti daytoy, maiyuswat ti fluvial parade kas pananglagip ken ni Nuestra Seniora Dela Paz ken panagyaman iti Dios ti ipapaayna nga adu nga ikan ken iti natalged a panagbanniit dagiti mangngalap kabayatan nga adda dagitoy iti tengnga ti taaw.
Mainaig iti daytoy, nagun-od ti maikadua a puesto iti ili ti Carasi, Magdadaran Talip Festival no sadino nakaiyawidda ti 500 a ribu a pisos idinto a ti maikatlo a puesto iti Siudad ti Batac, Empanada Festival no sadino nakaiyawidda met ti 300 a ribu a pisos.
Kabayatanna, dagiti consolation winners ket iti ili ti Piddig, iti Siudad ti Laoag, Nueva Era, Vintar ken iti ili ti Adams no sadino agpapada dagitoy a nakaiyawid ti premyo a sag-100 a ribu a pisos.
Malaksid iti daytoy, napili pay kas Best Production Design ti Municipality of Currimao, Best in Festival Music ti Municipality of Adams, Best in Festival Video ti Municipality of Dumalneg, ti Best Festival Male Performer ket ni Kenneth Wayne Vinluan iti Batac City ken Best Festival Female Performer ket ni Judelea Pucan Puyot iti Batac City.
