LAOAG CITY – Nasugatan ti maysa a suldado ken dua a sibilian kalpasan a natamaan ti shrapnel manipud iti inrubuat nga anti-tank missiles ti Hezbollah iti northern Israel.
Basar iti pannakangiawat ti Galilee Medical Center no sadino nakaikabil dagiti nasugatan, ti maysa kadagiti dua a sibilian ket agtawen iti 31 nga American citizen nga adda iti serious ken stable condition.
Immuna iti daytoy, sumagmamano a dosena a projectiles ken anti-tank missiles ti pinaruk-atan ti militante nga Hezbollah iti northern Israel nga apagapaman a nakasugatan ti maysa a suldado a dagus nga insalakan ken tinaming.
Inbatad ti militante a grupo a nangirubuatda ti rockets kadagiti sumagmamano nga Israel military sites.
Simmubbot met ti Israeli military iti babaen ti panangraut iti military structures ti Hezbollah.
Ti nasao a panangraut ti Hezbollah ket kagiddan ti inrubuat nga airstrike ti Israeli military iti northern Lebanon idi Sabado a nakatayan dagiti senior commander ti Hezbollah.
