LAOAG CITY – Naisalakan dagiti otoridad ti Indonesia ti 172 nga indibidual a nakalugan ti ferry nga agturong iti tourist island iti Bali iti baybay a sakup ti Lombok.
Naammoan a ti KM Putri Yasmin ferry ket timmalaw iti Padangbai port iti Bali a nagturong iti Lembar port iti Lombok, West Nusa Tenggara, basar ken ni Muhammad Hariyadi, mangidadaulo ti local rescue agency.
Ti insidente ket napasamak idi Agosto 12 iti alas-4:49 ti bigat iti Lombok Strait no sadinno a maysa ti nairekord a natay kabayatan a 172 ti naisalakan ken naitaray iti pantalan iti Bali ken Lombok.
Natalged ti maysa nga Australian idinto nga Indonesian dagiti nabatbati a dadduma.
Inbatad ni Hariyadi a sumurok 200 a tattao ti napan nag-rescue iti lugar.
Kabayatanna, saan nalawag no kasano a nauram ti ferry wenno no adda ti pakainaigan ti overcrowding a 114 a pasahero ken 17 a crew laeng ti nakarehistro iti manifest ti ferry.
