LAOAG CITY – Natay ti maysa a driver ti tren ken nasugatan ti saan a bumaba iti 40 nga indibidual kalpasan ti panagdinnungpar ti dua a tren nga asideg iti nalatak a tourist attraction a Machu Picchu idiay Peru.
Basar kadagiti otoridad, adda ti 20 nga ambulansia ti napan nagresponde iti lugar kagiddan ti panangitarayda kadagiti nasugatan iti ospital iti siudad ti Cusco.
Segun iti embahada ti Estados Unidos iti Peru, adda dagiti sumagmamano nga umili manipud iti Estados Unidos ti nasugatan gapu iti nasao nga insidente idinto nga inrakurak ti United Kingdom Foreign Office nga adda met dagiti sumagmamano a Briton ti karaman iti pasamak.
Mainaig iti daytoy, ginasgasut a turista ti nagtalinaed iti nakapasamakan ti insidente nga agur-uray ti pannakai-rescue dagitoy gapu ta narigat a madanon iti lugar.
Inbatad ti maysa nga health official nga adda ti saan a bumaba iti 20 a nasugatan ti nagsagaba ti nakana a sugat.
Napasamak ti panagdinnungpar ti dua a tren iti paset ti Ollantaytambo Station ken Aguas Calientes, ti kaasitgan nga ili ti Machu Picchu.
Naammoan a ti panagbiahe iti nagbaetan ti dua nga istasion ket masansan nga agpaut ti sumurok-kumurang 90 a minuto.
Ti dua a tren a karaman iti insidente ket ipatpataray ti PeruRail ken Inca Rail.
Kabayatanna, saan met pay a nalawag no ania ti rason iti napasamak nga insidente.
