LAOAG CITY – Balligi ti pannakisalakan ti maysa a lakay a na-stranded iti tengnga ti karayan idiay ili ti Sarrat.
Binigbig ni Municipal Administrator Pocholo dela Cruz iti nasao nga ili ti lakay a ni Hilario Tagata, agtawen ti 69 ken residente idiay Barangay 9, San Lorenzo.
Segun kenni Dela Cruz, naalaw ni Tagata babaen ti water search and rescue team iti nadakamat nga ili.
Malaksid iti daytoy, adda pay dagiti sumagmamano a lallaki a mapan agiyapon kuma ti dingwen da ti na-stranded gapo ta eksakto a dumakkel ti karayan.
Karaman ditoy dagiti agnagan ti Manuel Bumanglag, Patrick Ancheta, Felix Ancheta, Meynard Bumanglag, residente iti Barangay 8 ken ni Dajosto Ganal Jr. iti Barangay 7.
Inbatad na a na-rescue da pay dagiti uppat a baka ken 13 a kalding idinto a dagiti dua a nuang ket saan pay a naisalbar no sadinno nga adda iti tengnga ti karayan iti paset ti Barangay Tagipuro.
Immuna iti daytoy, naisalakan met ti agnagan ti Ralie Medrano a maiyan-anod iti karayan a batog ti rangtay ditoy ciudad ti Laoag.
Kuna dagiti sumagmamano a residente nga adda ti nakita ni Medrano a rakit iti tengnga ti karayan ken inpagarop na a saan a maiyanod.
