LAOAG CITY – Maysa ti natay ken tallo dagiti nasugatan iti napasamak a degrasya idiay Brgy. Baruyen, Bangui, Ilocos Norte.
Nabigbig ti natay a ni Reymark Isod, agtawen ti 21, awanan ti asawa ken residente idiay Pagdarawan, San Fernando City, La Union idinto a dagiti nasugatan ket isuda Joseph Ongcol y Abuhan, agtawen ti 46, naasawaan, driver; Roel Martin y Chua, agtawen ti 33, ken ni Mark Vincent Ravelo y Sera, agtawen ti 24, agpada a residente ti Pagdarawan, San Fernando City, La Union.
Iti imbestigasyon dagiti kameng ti PNP-Bangui, agpaamyanan a direksyon ti Isuzu forward a kukua ti Green Power Hardware and Home Depot, Lingsat, San Fernando City, La Union nga inturong ni Ongcol ken idi nakadanon iti zigzag a paset ti kalsada ket napukawan ti preno.
Gapo iti daytoy, nakabil ti lugan iti sabali a linya ti kalsada ken naidungpar iti poste ti street light.
Naamoan a da Isod ken Martin ken timmapwak manipud iti lugan ken naitaray da iti Bangui District Hospital ngem ni Isod ket naideklara a dead on arrival.
Nagsagaba met ti sugat iti nagduduma a paset ti bagi da Martin ken Ongocl idinto a ni Ravelo ken saan a naan-ano.
