LAOAG CITY – Inpeksa ni Mr. Armel Lazaro iti Brgy. San Francisco iti ili ti Dingras ti sakit ti nakem na kalpasan a natakaw dagiti taraken na a 10 a burias.
Segun ken ni Lazaro, mapan koma agpakan kadagiti baboy iti nasapa a bigat idi kalman.
Nu pay kasta, kuna na nga apaman a nakita na ti ubong ket awanen ti 10 a burias na ken maymaysa ti nabati pakairamanan ti pangganakan a baboy na.
Gapu iti daytoy, inbatad ni Lazaro a dagus nga inkamang na iti uliteg na nga tanod ken naireport iti kapulisan.
Inpakaammo na nga iti panagsalsaludsod na met kadagiti karruba da ket awan ti napuotan dagitoy a napan iti ubong da.
Immuna iti daytoy, kuna ni Lazaro a naikari a mausar koma iti panagtalon na ti paglakoan na kadagiti dingwen nu sadino a mailako na koma dagitoy ti lima ribo a pisos wenno nangangato pay iti tunggal burias.
Naamoan nga agarup 250 a metro met ti kaadayo ti ubong dagiti baboy ni Lazaro manipod iti pagtaengan da.
Kabayatanna, iti naibati dagiti maipagarup a mannanakaw iti ubong ti kaluggong, sako ken tali.
