LAOAG CITY – Inarestar dagiti kameng ti CIDG-Ilocos Norte dagiti 10 a lallaki a pakairamanan ti maysa a Barangay Chairman gapu iti illegal a panagtutupada da iti paset ti Barangay 51-A, Nangalisan ditoy ciudad ti Laoag.
Nabigbig dagiti suspek nga isuda Barangay Chairman Larry Alejandro iti Barnagay Cataban ditoy ciudad ti Laoag; Jerry Butay y Daoang, 41, negosyante, taga 51-A, Barangay Nangalisan; Dante Bumanglag, 59, taga Barangay Araniw; Willy Ramirez, 32, taga Brgy. Cataban; Nemesio Baoit, 41, tricycle driver, taga 48B Cabungaan; Morito Abatayo, 28, taga Brgy. Pila; Dave Pasamonte, 34, taga Brgy. San Bernabe, Laoag; Rommel Santos, 26, taga Barangay 26, Laoag ken ni Reagar Agorilla, 37 ken residente iti Barangay Pila ditoy ciudad ti Laoag.
Iti eksklusibo ng interview ti Bombo Radyo Laoag ken ni Police Staff Master Sergeant Joseph Califlores iti CIDG, inbatad na a dagiti nakumpiskar da nga ebidensya ket ti maysa a natay a para pallot a manok, maysa a nasugatan a manok, maysa a manok nga addaan ti gaff, 4 a sibibiag a manok, 10 a pedaso a gaffs, 3 a pedaso a sapin, dua a pedaso a panait, maysa a bassit a plastic box ken kwarta nga agdagop amin ti P11, 840.00
Inbaga ni Califlores a naaktwan da a mismo ti panagtutupada dagiti suspek iti panagresponde da iti nasao a lugar.
Innayon na a pilaan da ti reklamo a panaglabsing iti Presidential Decree 449 wenno Cockfighting Law ken ti Republic Act (RA) 11469 wenno Bayanihan to Heal As One Act.
Nagkedked metten dagiti suspek kangrunaan na ken ni Kapitan Alejandro a nangipaay ti komento iti pannaka-arestar da.
Kabayatanna, inbatad ni Barangay Chairman Gilbert Martillano iti Barangay 51-A, Nangalisan ditoy ciudad ti Laoag a saanna a ninamnama nga adda dagiti agtutupada iti masakupan na a lugar.
Innayon na a madlaw a nairanta a naaramid ti pagtutupadaan iti lugar da.
Inadmitir na nga adda ti panagliway na ta saanna a nakita dagitoy ngem awan ti mabalin na ta makumikum da nga agbanbantay kadagiti checkpoints iti barangay da gapu iti maipatpatungpal nga Enhanced Community Quarantine (ECQ).
