LAOAG CITY – Nanayon ti 10 a milyon a pisos ti balor dagiti pagay a nadadael ditoy probinsia gapu iti agtultuloy nga El Niño phenomenon.
Daytoy ti inpakaammo ni Engr. Ma. Teresa Bacnat, ti mangidadaulo iti Provincial Agriculture Office kalpasan a dumanonen iti 38,269,932.74 ti gatad dagiti nadadael a mula a pagay dagiti mannalon iti bulan ti Abril no idasig iti immunan a rekordda idi bulan ti Pebrero a 23,481,781.27.
Segun kenkuana, daytoy a gatad ket kaibatugan ti 861.84 nga ektarya iti pagay no sadino a ti kaadduan ket manipod iti ili ti Bacarra nga 160.08 nga ektarya.
Inbatadna a malaksid iti nasao nga ili ket karaman pay a naapektaran iti ili ti Bangui, Burgos, Pagudpud, Pasuquin, Piddig, Vintar, Badoc, Banna, Dingras, Nueva Era, iti siudad ti Batac ken ditoy siudad ti Laoag nga addaan ti pakabuklan a 2,246 a mannalon ti naapektaran.
Inlawlawagna nga agtultuloy pay ti panangkiddawda kadagiti mannalon ditoy probinsia iti panangliklik pay laeng ti panagmula kadagiti produkto agrikultura nga agkasapulan ti adu a danum nangruna no awan met ti makaanay a suplay ti danum a pangalaan.
Inpalgakna nga uray adu dagiti makinaria nga ited ti opisinada ngem narigat ti mangpataud iti danum iti baet ti panawen ti kalgaw.
Innayonna nga adda dagiti naipaaydan nga 140 units water pump, fuel subsidy, 103 units SFR, 285 units water harvesting facility, 37 irrigation hose ken spring development no sadino a kadagupan kadagiti naibunong a tulong ket agbalor iti 15,476,950.00.
