LAOAG CITY – Umabot iti nakurkurang ngem 10 a milyon a pisos ti dagup dagiti naipaay a tulong kadagiti mannalon, mangngalap ken livestock raiser iti sangoanan ti conference hall ti Provincial Agriculture Office.
Daytoy ti naammoan manipud ken ni Mrs. Luz Ortal, mangidadaulo ti Sustainable Development Center wenno SDC.
Segun kenkuana, nakurkurang ngem walo a milyon a pisos ti dagup dagiti naipaay a tulong kadagiti mannalon a nakiddaw iti babaen ti Agri Ka Dito Hotline.
Inbatadna nga innem a gasut tallopulo ket pito dagiti mannalon a nabenipisiaran iti babaen ti nasao a programa.
Inlawlawagna a karaman kadagiti naipaay kadakuada dagiti bin-i nga irik, bin-i a mais, soil conditioner (humus), “foliar fertilizer” ken pestisidio.
Kunana a dagiti naipaay a suporta kadagiti mangngalap ket agdagup iti nasursuruok ngem maysa a milyon a pisos para iti 108 a mangngalap iti nagdumaduma nga ili ditoy probinsia.
Kabayatanna, inpakaammo ni Provincial Veterinarian Dr. Loida Valenzuela a naigiddan a naipaayan ti tulong dagiti sanga gasut uppat a pulo a livestock raiser nga agdagup ti innem a gasut tallopulo ribu pito gasut a pisos (630,700).
Innayonna a karaman kadagiti naipaay ti sangaribu uppat a gasut a “free ranged chicken” ken pitopulo a sako ti chicken feeds nga agdagsen ti limapulo a kilo ti maysa a supot.
