LAOAG CITY – Dakkel a tulong ti 10 a ribu a panagpagna iti kada aldaw tapno malappedan ti agingga 40% iti kaso ti dementia.
Dakkel a banag ti panagbalbaliw iti lifestyle kas panagsardeng ti panaginom ti arak, nasapa a panagturog ken panagpatalinaed nga aktibo ti bagi.
Ti dementia ket nagtalinaed a maysa kadagiti pagam-amkan a sakit isu a masapol nga ilungalong dagiti doktor ken gobierno a suportaran dagiti panagbalbaliw iti lifestyle iti babaen dagiti baro a programa ken pagannurotan.
Nakarigrigat iti panangbaliw ti nakadawyan a lifestyle kas ti masansan a pannangan a mangitunda ti panaglukmeg.
Basar kadagiti eksperto, ti panagbalbaliw laeng iti lifestyle ti kakaisuna a namnama tapno maitantan ti panag-develop ti dementia.
Iti maisaysayangkat a panagadal, karaman kadagiti factor a nakatulong tapno ngumato ti peggad a maaddaan ti dementia ket iti kinaawan ti physical activity, napigsa a panaginom ti arak, kurang iti turog, social isolation, pannakapukaw iti panagdengngeg, poor diet, hypertension, obesity, diabetes, traumatic brain injury, panagsigarilio, depresyon ken air pollution.
