LAOAG CITY – Positibo ti naiyuswat a drug buy bust operation iti Barangay 48-A, Cabungaan North ditoy ciudad ti Laoag babaen iti Provincial Drug Enforcement Unit (PDEU).
Binigbig ni Police Chief Master Sergeant Harold Nicolas, mangidadaulo ti PEDU ti suspek a ni Ronald Ramos, maysa a driver kadagiti delivery truck ken residente iti Barangay 22 iti ili ti San Nicolas ngem agkaskasera iti Barangay Bengcag.
Segun kenni Nicolas, ti nakapasamakan ti transaksyon ket iti Barangay Bengcag ngem saan da a natiliw iti nasao a lugar gapo ta maipagarop a nagtaray ni Ramos ken ginandat na a patarayen ti truck ngem dagus a nalapdan babaen iti pannakaisangga ti lugan ti pulis.
Inlawlawag na a gapo ta napigsa ni Ramos ket narigatan dagiti dua nga ummuna a pulis ken gapo iti panagresistir na ket adda ti sangkabassit a sugat iti ima na.
Nakumpiskar manipud iti suspek ti lima a sachet ti maipagarop a droga nga agbalor ti lima ribo a pisos ken iti ikot na a lima pay a sachet iti maatap met laeng a droga.
Naamoan a ni Ramos ket nabayagen nga high value individual iti biang ti INPPO, Top 10 pay iti Police Regional Office 1 ken miembro iti maysa a drug group nga agop-operar ditoy Ilocos Norte.
Malaksid iti daytoy, kuna ni Nicolas a ni Ramos ti kaunaan a miembro a natiliw manipud iti nasao a drug group.
Kuna ni Nicolas a ti droga ket aggapo iti Metro Manila ken makastrek ditoy probinsya babaen iti trabaho na kas maysa a truck driver.
Kabayatanna, naiget a naglikudan ni Ramos a saan na a kukua dagiti droga gapo ta maipagarop nga innala dagiti pulis ti bag na nga inyadayo.
Inpetteng na pay a saan a nagtaray ken saan a nagresistir no diket adda iti adda iti kasera da gapo ta agbyahe da ita nga aldaw.
Inadmitir ni Ramos a nagus-usar ngem ti ummuna ken maudi a panagusar na ket idi 2017 ken saan nga aglaklako, kasta pay a nakasagana nga agpadrug test.
Mainaig iti daytoy ket nagkedked ni Ramos a nangpirma iti dokumento a nakaipanan dagiti naimbentaryo a nakumpiskar gapo ta inpetteng na a saan na a kukua dagitoy.
