LAOAG CITY – Kinumpirmaran ni Mayor Alexander Calucag iti Solsona, Ilocos Norte ti pannaka-impound dagiti lugan wenno equipments a kukua ni Adams Vice Mayor Francis Espiritu iti ili da.
Inlawlawag na a saan nga isuda a mismo ti nangtiliw kadagiti nasao nga equipments no di ket ti met laeng ti gobierno probinsyal ken nagbalin da laeng a supporting da laeng iti ili a Solsona.
Segun ken ni Calucag, naimpound dagiti lugan ti nasao a bise mayor gapu ta maipagarop nga awan ti permit da nga agisayangkat ti panag-quarry iti ili a Solsona.
Kuna na a nangrugi pay laeng ti operasyon dagiti maseknan itay napan a tawen ngem ita da laeng a naoperasyunan.
Innayon na a nakigtot dagiti agiturturong kadagiti nasao a lugan idi makita da dagiti pannakabagi ti gobierno probinsyal.
Mainaig ti daytoy, ibilang ni Sang Panlalawigan member Nonong Marcos a nababoy ti karayan a pagal-alaan ti batbato ken darat dagiti lugan ni Adams Vice Mayor Espiritu.
Inpetteng na nga iti panagturong da ti lugar ket adon dagiti nadadael ken saanen a napintas ti plastar na malaksid ti kaawan pay ti permit dagiti maseknan.
Kabayatanna, inbatad ni Vice Mayor Francis Espiritu iti Adams, Ilocos Norte nga awan ti reklamo na iti aniaman nga addang nga aramiden ti gobierno probinsyal.
Kuna na a karbengan dagiti maseknan ti mangipatungpal ti ammo da a pagsayaatan.
Mainaig ti daytoy, kuna ni Espiritu a makaammon ton ti abogado na nga agsungbat no maipilaan ti kaso administratibo ken kaso kriminal.
