LAOAG CITY – Umabot iti 10 nga indibidual ti inpaayan ti Philippine National Police (PNP) ti citation ticket iti ili ti San Nicolas.
Daytoy ti inbatad ni Police Major Joseph Tayaban, ti chief of police iti ili ti San Nicolas.
Inlawlawag ni Tayaban nga iti umuna nga aldaw a pannakaikabil ti probinsya iti Alert Level 3 ket 10 nga indibidual ti natiliwan da a saan a nakasuot ti face mask.
Gapu iti daytoy, inisyoan da ti citation ticket dagiti maseknan ket masapol a bayadan da ti multa da a sangaribo a pisos iti uneg ti tallo nga aldaw.
Innayon na a no saan a makabayad ti multa dagiti maseknan ket mabalin da ti ag-community service iti mismo a barangay da.
Kuna ni Tayaban a no malpas dagiti maseknan ti panag-community service da ket mangipaay ti kapitan ti sertipikasyon a mangipaneknek a nalpas da ti naipataw a pannusa kadakuada.
