LAOAG CITY – Umabot iti 10 a tattao dagiti natay ken 13 dagiti nasugsugatan kalpasan ti napasamak a gas explosion iti sewage system idiay Karachi City, Pakistan.
Segun ken ni Dr. Sabir Memon iti Trauma Center, tallo kadagiti nasugsugatan ket adda iti kritikal a kundisyon idinto a dagiti dadduma ket nagtalinaed iti intensive care unit.
Immuna iti daytoy, kuna ni Police spokesman Sohail Jokhio a ti nasao a panagbettak ket namunganay manipod ti accumulated gas iti sewer nga adda iti babaen ti bank building iti kabangibang a siudad.
Malaksid kadagiti nadangran nga indibidual ket nadadael ti tawa dagiti asideg a pasdek pakairamanan dagiti behikulo a nakaparking.
Kabayatanna, kuna ni Jokhio a saan pay a masinunuo ti rason a gimmilyaabti gas ken agtultuloy ti panangimbestigar dagiti explosives experts iti nasao nga insidente.
Naamoan a kaadoan a sewage channels iti Karachi ket nakalluban ken illegal.
