LAOAG CITY – Natay ti driver ti maysa a 10-wheeler dumptruck kalpasan a natennag ti inturong na a lugan iti derraas idiay Banna, Ilocos Norte.
Binigbig ni Police Chief Inspector Artemio Clemente, ti chief of police iti PNP-Banna ti biktima a ni Robert Pasion, agtawen iti 43, taga Barangay Bugasi iti met laeng ili a Banna.
Inbatad ni Clemente a basar iti imbestigasyon da, napan nagitulnog ti biktima kadagiti dardarat idiay Barangay Bininggan iti ciudad ti Batac, idi agsublin ken apaman a sumreken iti ili a Banna ket isu metten ti pannakapasamak ti desgrasya.
Segun ken ni Clemente, possible a nakaturog ti biktima bayat ti panagbiyahe na rason a natennag ti inturong na a truck iti derraas nga addaan ti kauneg a mapatta-patta a 16 a metro.
Gapu ti napasamak ket naipit ti biktima a nangitundan iti ipapatay na.
