LAOAG CITY – Maipaayan ti tulong dagiti 100 a distressed Overseas Filipino Workers manipud iti gobierno probinsial.
Segun ken ni Mrs. Aleth Policarpio, mangidadaulo ti Office of the Barangay Affairs ken OFW Desk Officer, maisayangkat daytoy a programa inton Marso 13.
Inbatadna a kaaduan kadagiti benepisiario ket naggapu idiay Middle East.
Inlawlawagna a dagiti maibilang a distressed OFW ket dagiti nagpasar ti pannakaidadanes ken pannakaparparigat a nangitunda ti pannakaapektar ti salun-atda.
Naammoan a sangapulo a ribu a pisos ti pinatgan ti gobierno probinsial a maipaay a tulong kadagiti maseknan.
Mainaig iti daytoy, gapu ta saan met a dumanon iti 100 dagiti sumangsangpet a distressed OFW ditoy probinsia iti tinawen ket inpalubosda a nagaplikar dagiti Overseas Filipino Workers a simmangpet manipud idi 2022 nangruna kadagiti saan pay a pulos a nakaawat ti tulong.
Kabayatanna, inpakaammona a dagiti requirements ket ti certification manipud iti Overseas Workers Welfare Administration wenno Philippine Overseas Labor Office a dagitoy ket distressed, pasaporte ken adda ti porma a fill-out-an dagiti maseknan nga OFW.
