LAOAG CITY – Nagun-od ti Persons with Disability Affairs Office (PDAO) ditoy ciudad ti Laoag iti kangatwan a grado a 100% Functionality rate para iti tawen 2022, 2023 ken 2024.
Daytoy ti naragsak nga inpakaammo ni Mr. Christoper King Medina, Disability Affairs Officer 4 iti Persons with Disability Affairs Office ditoy siudad.
Segun kenni Medina, daytoy ket resulta iti assessment iti Department of the Interior and Local Government ditoy ciudad ti Laoag.
Inlawlawag na a daytoy ti maysa a pakakitaan iti napintas a panangtratar ti opisina da kadagiti kasapolan dagiti addaan iti rangkap ti bagina.
Kunana a babaen kadagiti programa ken aktibidad nga ar-aramiden iti opisina da ket ad-adda pay a mapapigsa daytoy tapno ad-ado dagiti matulungan da.
Mainaig iti daytoy, nagyaman ni Medina iti lokal a gobierno iti suporta nga ipapaay na kadakuada.
Inpasingked na iti naiget a panagtrabaho dagitoy tapno mapaimbag ti salun-at, pisikal ken pagsapulan dagiti nasao a Persons With Disability.
