LAOAG CITY – Umabot iti 100 a Persons With Disability Riders/Drivers to nakipaset iti naisayangkat a Theoretical Driving Course and Road Safety Seminar iti locos Norte Centennial Arena.
Segun ken ni Ms. Rochelle Gajes iti Provincial Social Welfare & Development Office, naiyuswat ti nasao nga aktibidad iti panagbinnulig iti gobierno probinsial babaen iti Persons With Disability Affairs Office nga idadauloan ni Mrs. Carolyn Domingo, Land Transportation Office iti rehion uno ken ti Motorcycle Philippines Federation Inc. (MCPF).
Immunan nga inbatad ni Gajes a paset daytoy iti pannakidanggay ti gobierno national iti National Disability Rights week iti napalabas a bulan ngem naitantan laeng gapu iti idadalapus dagiti nagsasaruno a bagyo iti probinsia.
Segun kenkuana, naipaayan dagiti maseknan ti “online generated certificates” manipud iti “individual Land Transportation Office portal” dagitoy.
Kabayatanna, kuna ni Domingo a malaksid kadagiti adda rangkap ti bagina ket nakipaset pay dagiti agserserbi ti Persons With Disability Affairs Office ken dagiti Local Government Units ditoy probinsia.
Kabayatanna, inlawlawag ni Mr. Ariel Paolo Tejada manipud iti Land Transportation Office – Region 1 a ti naipaay kadagiti maseknan a Theoretical Driving Course certificate ket maysa kadagiti requirement iti panangala ti “student permit”.
