LAOAG CITY – Napunno ti maysa a mall kadagiti agtataray nga aso idiay Shenzhen, China kalpasan a nakaruk-at dagiti 100 nga husky manipod iti maysa a pet café a tenant ti mall.
Napagsasaritaan dagiti Chinese iti online dagiti bidyu a naala dagiti mall goers no sadino nagtataray kadagiti nagduduma a paset ti mall dagiti nakaruk-at nga husky. Basar iti report, nalipatan a nakalukat ti maysa kadagiti staff ti “Haha Husky Cute Pets” café ti gate no sadino nakapupok dagiti aso.
Ti Haha Husky Cute Pets ket maysa a pet café no sadino ket mabalin a makiay-ayam dagiti customer kadagiti husky. Dimmanon ti maysa nga oras sakbay a naisubli iti cafe dagiti 100 nga aso. Awan met ti naperwisyo wenno nadangran a mallgoers ngem sumagmamano kadagitoy ket inagawan ti makan dagiti husky.
Basar iti South China Morning Post, uso idiay China ita dagiti pet café. Idi 2020, nasurok a 3,600 a pet café ti naglukat iti Shanghai. Malaksid kadagiti husky, adda dagiti pet café nga addaan ti nagduduma a klase ti ayup kas ti pusa, baboy ken dadduma pay.
Ti konsepto ti pet café ket nangrugi idiay Japan. Inpatakder dagiti nasao a café para kadagiti tattao nga agkalikagum a maaddaan ti taraken nga ayup ken makiay-ayam ngem saan a mabalin nga agitugot ti bukudda a taraken gapu ta naiget daytoy a maipawil.
Kalpasan ti insidente, nangiruar ti statement ti Haha Husky Cute Pets iti Weibo account-da no sadino dimmawatda ti panagpadispensar kadagiti mall goers a naistorbo gapu iti panangbaybay-a dagitoy.
