LAOAG CITY – Maiwayat ti community outreach program a maysa kadagiti programa ita a nutrition month 2024 ditoy Ilocos Norte.
Daytoy ti inpakaammo ni Miss Elma Irapta, ti mangidadaulo iti Provincial Nutrition Action Office iti kapitolyo probinsyal.
Kunana a daytoyen ti maikadwa a gundaway nga iwayat da ti nasao a programa a gagem na a tulongan dagiti malnourished nga ubbing ditoy probinsiya.
Inbatad na a kabayatan ti programa ket addan to dagiti maibunong a multi vitamins, fortified rice manipod iti Department of Science and Technology (DOST) ken adda pay dagiti nutritionist ken dietician a mangipaay iti counceling kadagiti partisipantes.
Inbatad na a iti nasao a programa ket mailaunch iti feeding program a nutribun ken pasteurize milk ni Governor Matthew Marcos-Manotoc nga agpaot iti 120 nga aldaw ken launching iti kitchen gardening every home no sadinno nga adda met dagiti bukbukel a maibunong a mabalin da nga imula kadagiti arubayan da a pangalaan ti nasustansiya a makan nu mapatanor da a nasayaat.
Inpakaammo na nga adda iti 100 nga ubbing a priority beneficiary da para iti nasao a programa a maangay intono Hulyo 30 iti Centennial arena mangrugi iti oras ti alas-otso ti bigat agingga iti alas-kwatro ti malem.
