LAOAG CITY – Kinumpirmaran ni Mr. Perry Martinez, Acting General Manager ti Ilocos Norte Electric Cooperative wenno INEC nga adda laeng ti 1000 household ditoy probinsia ti awan pay ti kurientena.

Segun kenkuana, adu dagiti rason no apay nga awan ti koneksion ti kurienteda no sadinno a maysa ditoyen ti lokasion dagitoy.

Inbatadna nga uray kalikagum ni Gov. Matthew Marcos Manotoc a mapasilawan amin dagitoy ngem saanda met a mabalin a pasilawan nangruna kadagiti adda iti bantay no maymaysa.

Nupay kasta, inlawlawagna a tapno mapasilawan dagitoy ket solar ti ikabilda babaen ti electrification program ti gobierno.

Mainaig iti daytoy, malaksid kadagiti nasao a situasion ket 100 a porsiento nga energized ti probinsia.

Kabayatanna, maragsakan dagiti residente iti Sitio Babang iti ili ti Burgos ti pannaka-energized ti sitioda gapu ta maysa a tawen nga inurayda daytoy.

Inbatad ni Vice Mayor Russel Garcia, dakkel ti panagyamanda kalpasan a pinatgan ti kooperatiba ti nabayagen a kiddawda.

Naammoan a daytoy ket sumurok-kumurang maysa a milyon ti balorna pakairamanan dagiti wire ken transformer a nausar a dagitoy ket manipud iti National Electrification Administration.